யார் மாற்றுத் திறனாளி

யார்
மாற்றுத்திறனாளி ?

பசித்தவன் பிச்சைக்கேட்டதும், மனமிருந்தும் சில்லறை இல்லாததால், காதுகளிருந்தும்
சில நேரங்களில்
நான் கூட செவிடனாகிறேன்!

சிற்பி செதுக்கிய கல்சிலைகளை, கோயில்களில் காலந்தவறாமல் வழிப்படும் நான்,  எனக்கு
உயிர்கொடுத்த உண்மைக்கடவுள்

என் தாயை கண்டுகொள்ளாத சிலநேரங்களில்
நான் கூட குருடனாகிறேன் !

என் நியாயமான கருத்துக்களை ஆட்சியாளர்களிடமும், அதிகாரிகளிடமும் எடுத்துரைக்க முடியாத
சில  நேரங்களில்
நான் கூட ஊமையாகிறேன் ! 

திறமைகளிருந்தும், சோம்பேறி தனத்தினால் உழைக்காமல், நாட்களை நகர்த்திக் கொண்டிருக்கும்
என்னால், வெற்றியாளனாய்
வீர நடை
போட முடியாததையெண்ணி,சிலநேரங்களில்
நான் கூட நொண்டியாகிறேன் !

யாராவது
புதுமைகள் படைத்தால், பூரிப்படைந்து பாராட்டும் நான், எனக்கு மிக நெருக்கமானவர்கள் சாதித்துவிட்டால்,
கை தட்டவும் முடியாமல்,
கை குலுக்கவும் மனமின்றி,  வென்றவனைக் கூட குறைகூறிக் கொண்டிருக்கும்
சில நேரங்களில்
நான் கூட
கையிழந்த ஊனனாகிறேன் ! 

போதையில்
பாதை தடுமாறி,
சுய ஒழுக்கம் தடம்மாறி
ஆடி, ஆடி நடக்கும்
சில நேரங்களில்
நான் கூட
ஆட்டிசம் வந்தவனாகிறேன் !

உடல் உறுப்புகள் சரியாக இருக்கும் என்னைவிட, அடுத்தவனை புறங்கூறாத
ஊமை
எவ்வளவோ மேல்! 

அடுத்தவர்கள் கூறும் விமர்சனங்களைக் கேட்டு,
நொந்து போகாத செவிடர்
எவ்வளவோ மேல்! 

அடுத்தவரை மிதித்துத்தள்ளி முன்னேறும் போலி ஜாம்பவான்களைவிட, நொண்டி
எவ்வளவோ மேல்! 

இலஞ்சம்
வாங்கும்/கொடுக்கும்
கைகளை விட, இரண்டு கைகளை இழந்தும் நம்பிக்கையிழக்கா
கை ஊனன் எவ்வளவோ மேல்! 

சோம்பேறி பிச்சைகாரன்களைவிடகண்ணிழந்தும்
ஏதோ ஒரு பொருள் விற்றுப் பிழைக்கும் சுய கௌரவமான, குருடன்
எவ்வளவோ மேல்! 

பொறுப்பு தலைக்கேறியதும், கர்வத்தோடு எல்லோரையும் ஆட்டிப்படைக்கும்
சில
மேதாவிகளை விட, ஆட்டிசம் நோயுற்றவன் எவ்வளவோ மேல்! 

உறவு முறையில் திருமணம் செய்து,  ஊனமுற்றோரை உருவாக்கும்
பாசக்கார விழிப்புணர்வில்லா மனிதர்களை விட, எல்லா வலிகளையும், தாங்கிக்கொண்டு, சங்கடங்களை சமாளித்து,
எதிர்நீச்சல்
போட்டு வாழும் ஊனமுற்றவன் எவ்வளவோ மேல்! 

உள்ளத்தில்
ஊனம் கொண்ட நம்மை விட, மாற்றுத்திறனாளிகள் என்கிற
உலகை மாற்றும் திறனாளிகள் எவ்வளவோ மேல்! 

எல்லோரையும் அரவணைக்க வேண்டியது
நம் பொறுப்பு;

இன்முகத்துடன் எந்நாளும்
இருப்பது சிறப்பு! 

நம்மை உலகிற்கு அறிமுகப்படுத்தியது நம் பிறப்பு!

சமமான வாய்ப்பை கொடுக்கத்தான் போகிறது இறப்பு!

இன்னும்
கொஞ்ச நாட்களே
நம் வாழ்வின் இருப்பு !

இயலாதவர்களை விட, முயலாதவர்களே, தோற்றுப்போகும் திறனாளிகள்! 

முயலாதவர்களை விட,
இயலாதவர்களே உலகை மாற்றிய/மாற்றுகிற மாற்றுத்திறனாளிகள் !

ஆம் !
கொஞ்சம் நீயும் சிந்திப்பாயா சினேகிதனே,

யார்
மாற்றுத் திறனாளி